الأربعاء، 10 نوفمبر 2010

ميدان عابدين .. التامنه ..ثانويه عاميه بردو



سم الله الرحمن الرحيم 
عودا احمد بعد طول غياب واجازه لاجل غير مسمى قولت عليها بهزار وقلبت بجد والحمدلله بس ادينا بنحاول نرجع ونسخن زى بتوع الكورة علشان ناخد الفورمه 

ميدان عابدين .. التامنه ..ثانويه عاميه بردو 

خلصت تانيه ثانوى بقى ونفسيات محطمه زى مازكرنا سابقا ان هما اللى اعتبرونى الطالب المثالى مع تاكيدات نهائيه منى اننى لست هذا الرجل ومع ذلك اصرو على موقفهم ولذلك خليهم يشربو بقى . حاولت انى الملم نفسى علشان اكمل مش اول واحد يجيب مجموع نص كم يعنى والى حد ما قدرت اعمل كده بس النصب التذكارى للفشل كان دايما ادام عنيا تقدر تقول عدم ثقه بالنفس

دخلت تالته ثانوى وفى اول يوم دراسه كل واحد بيسال التانى جبت كام وبتاع هو اللى جايب مجموع منيل بيبقى بيدور على اللى زيه واقل منه عملا بالمثل القائل لا تعايرنى ولا اعايرك .اما اللى جايب مجموع عالى فبيدور على الفئه بتاعته ويسمو نفسهم الشطار 
اول بقى يا خويا الاقيلك كل واحد جاى يسألنى ها يا معلم عملت ايه وكل واحد اقوله المجموع ميصدقش ياعم يهديك يرضيك ميصدقش 
يقولى انت جايب مجموع كويس بس خايف من الحسد وبتاع مع العلم انى ابعد مايكون عن الحواطه والخباثه والحاجات دى واعتقد فى كثيرا من الاحيان ان ده اللى جايبنى ورا بدات الدراسه والكل بعد فترة اتاكد ان ده مجموعى فعلا وكان لازم اجتهد شويه عايزين نفرح الست الغلبانه اللى قاعده فى البيت
وبصراحه كنت داخل السنه ومتحفز انى اجيب مجموع كبير مش معقول كده وكان عندى اتنين اصحابى كان ليهم دور بالغ الاهميه 
حد بيحاول يجتهد لازم نقف جمبه مش معقول نسيبه كده هو الصاحب له عند صاحبه ايه؟؟

المهم الاتنين الحلوين دول غيرو فيا حاجات كتير اوووووووى 
يعنى مثلا انا طول سنين عمرى الدراسيه ماهو الانسان ايه غير شويه ترمات متركبه فوق بعض فى كل الترمات دى بقى كان مسموحلى انزل يوم الخميس فقط وانا فعلا كنت ملتزم بده 
جم الاتنين دول بقى خلونى انزل تقريبا 5 ايام فى السبوع ويسم الله ماشاء الله كان دايما عندهم حججهم ومش بيغلبو فى اى شىء 
انا اكيد مش كل يوم هقدر انزل واخرج وكده ..كانو البهوات يقولو انزل ومفيش مشكله مكنتش ايامها مهتم ولا بنت ولا جيمز ولا الكلام ده خالص علمونى جميع انواع وسبل تضييع الوقت 

بدانا بالنت والكلام ده ودخلنا على الجيمز ومكنتش بعرف العب هنعلمك لحد ما بقيت احرفهم بس مش ده المهم كنت اوقات بحس انهم شياطين بس كنت بحبهم وكنت بنزل معاهم دايما بس كان فى اختلاف بينى وبينهم وهو ان انا عندى معاد الدرس ده مقدس ممكن اروحه وبعد كده اصيع معاهم براحتى وهما كانو ممكن ينفضو لاجدعها درس ويتشبرقو بفلوسه مش بقولكم شياطين المهم مشيت السنه على هذا المنوال لا وكنت من الملتزمين اوى الصبح فى المدرسه تقريبا كنت بوصل اول واحد 7 الا ربع بالدقيقه ابقى هناك ونفضل نلعب كورة لحد 8 الا ربع يضرب الجرس بتاع الطابور ولانى مش زى اى حد فمكنتش بقف طابور وكنا بندخل اوضه التربيه الرياضيه نلعب بنج بونج وكان المدرس بتاع التربيه الريضيه بيوافق بمقابل هو مش طيب يعنى وكان المقابل ان الوضه تتكنس ووتتنضف ولانى مجددا مش زى اى حد فكنت بخلص لعب معاهم وازوغ من حصه النضافه الرياضيه دى وكنت ضمن اغرب 10 طلاب فى المدرسه اللى هما الفرقتين اللى بيلعبو الصبح وده لان كل الطلبه بتبدا اول حصه فريش وزى الفل ومصحصحين الا احنا طبعاااااااا ساعه اشغال كرويه شاقه 
والسنه اللى كنت بادئها وبقول هعمل واسوى بقيت اضيع فيها وقت كتر من اللى كانت قبلها ومبقتش حابب زاكر وده لانى زاكرت السنه اللى قبلها وكانو دايما الولاد دول يغنو ويغيظو بعض هتفشل اااااه ترتيتتى هنفشل لاااااااااا تريتتى وانا كنت بقعد اضحك عليهم لحد ما الامتحانات قربت ون بدت ازاكر واخد الموضوع بجديه واتشطرت حبتين ..

بصو يا جمعه انا كنت ناوى اكمل النوت بس اسف حد قلى حاجه عكننتنى شويه
وانا كنت لازم انزل حاجه النهارده.. نكملها بكرة باذن الله

ليست هناك تعليقات:

إرسال تعليق