نجحنا والحمد لله فى اولى ثانوى هو اه كانت مواد كتير بس كانت العمليه كوسه وكله بينجح كالمعتاد يعنى مفيش اى جديد ..دخلنا تانيه ثانوى والكل متحفز جداااااااا والامال والطموحات بقى لعنان السماء انا من الاول قولت انا مستوايا عادى فهخش ادبى واجيب مجموع نص كم يرمينى فى اى كليه من الكليات السكلانس مع احترامى لجميع كليات القاع والكليات الشعبيه والجماهيريه كمان ..ناس كتير قالك احنا هنخش علمى واللى يقولك عايز طب واللى عايز هندسه قولتلهم ربنا يوفقكم وانا عارف ان كتير منهم هيحولو بعد سنه تانيه والصدمه من المجموع بس عادى يعنى اللى بيشيل قربه مخرومه بقى مش مشكله حد الا هو .
بدات الدراسه كان ناس كتير شايفين انى شاطر مع انى مكنتش شايف مبرر لدعواهم دى فى اول السنه لقيت الهير بتاع الالمانى وكان حقيقى مدرس كويس قالى انا عايزك تيجى تاخد عندى درس وبنص التمن بس علشان عايز نتيجتك تبقى طالعه من عندى معرفش كان متوسم خير فيا انى اجيب الدرجه النهائيه ولا ايه بس هو بيعمل كده كنوع من الدعايه ولانى كنت بحب الالمانى جداااااااااا مشينا فى الدراسه ومكنتش باخد دروس فى كل المواد
وكان فى درس الانجليزى امتحان كل اسبوع وكان الاول ياخد وان جندى وانا كنت بحب التحدى وكان الاول فى الحصه المستر بيبقى مبسوط منه فمكنتش بتنازل عن الاول وفضلنا على كده والحماس تمام وبدات احس انى فعلا شاطر انا حتى مرة كنتى ماشى فى المدرسه والاقيلك ياخويا اتنين من اللى بيدونى ف الفصل واقفين ينمو ولاد اللذينه وانا معدى طب اختشوو يا بعدا ابدااااااااااااا
واحد قال للتانى انت عارف الواد سيد ده شاطر جدااااااااا التانى رد عليه قالو فعلا بس ميجيبش 95% اه يا ولاد اللذينه مبسيبوش حد فى حاله خالص .مكنتش بحب ازاكر بس كنت شاطر عارفين اللى بيقعد على المزاكرة ككل احاسيس ومشاعر الدنيا تجيله ممكن اخواته وحشوه او بمعنى اصح بقالى ربع ساعه مرخمش عليهم
يفنكر حاجه يقولها لماما معرفش عايز يدخل الحمام ممكن فى اللحظات دى بردو اقلام البيت كله تخلص وتضيع وتتقصف
وياسلام بقى لو نزلت اجيب حاجه ربنا يدينا ويديكو طوله العمر
وبعد ده كله كنت شاطر فى كل المواد وفى الدروس مقششششط المدرسين فى فلوسهم واحد مجتهد بقى ولازم نكافئه وكل المكفات ماتزيد انا مزاكرش خالص ببساطه لانى مكنتش شايف نفسى اللى يجيب 90 ومافوق وحتى لو جبتهم هدخل ايه فعادى بقى نزاكر على الاد ونجيب مجموع عادى زى سلو بلدنا وناسنا واهلنا
طبعا ده اكبر غلط وجهل وفقر فى الاحلام وغباء فى الطموح
المهم الحياه كانت ماشيه حلو فى البيت شايفنى مش بزاكر وغلبو معايا والله الناس دى بتتعب حقيقى مش عارف ابنى هيغلبنى كده ولا ايه ومع ذلك هما كانو عارفين انى شاطر مشيت الدنيا عادى والححياه زى الفل لحد ماجينا يوم خير اللهم اجعله خير مسابقه الطالب المثالى ودى ايه دى يا خويا ..المهم قالو انه هيعملو استفتاء ويسئلو كل مدرس مين اشطر طالب عندك هو ييرشح واحد يعنى وبعدها يقولو ده احسن واحد فى الفصل انا مهتمتش ولا فى دماغى والاقى كل مدرش شبه بيقولى انا ظبطتك وبردو ولا فى دماغى وفجاه فى يوم لاقيتهم بيقولولى انت الطالب المثالى كنت عايز اقول العالم دى هبله ولا ايه بس رجعت قولت هما يعرفو اكتر منك يا واد ياسيد وانا اكيد مش هكره لنفسى الخير .
جم فى يوم قالولى انتو النهارده هتطلعو وتتكرمو وكده حلو جدا جو التكريمده وانك تطلع ادام الناس كلها ويندهو اسمك ويسقفولك وتحمل لقب الطالب المثالى وبصرف النظر عن ان انت مش مقتنع انك تستحقه بس الواقع بيقول انك تستحقه وخليكو فاكرين ان هما اللى مصممين مش انا روحت اليوم ده وفى طابور الصباح ندهو عليا وطلعنا واتكرمنا وسط تسفيق وتهليل الحاضرين وطبعا كلنا منشكحين يومها خدت شهاده حلوة اوى وروحت فرحان علشان اديها لماما وبابا وفرحو بيها جدااااااااااااا وابويا اصر يبروزهالى
ياعم الحاجه بلاااااش ابدا يهديك يرضيك ابدااااااا قولتله طيب
المهم بروزها وبقى كله مترقب مجموع الطالب المثالى واد ايه ممكن يجيب مجموع كبير وبقى العين عليا من زمايلى والمدرسين والاهل والاقارب واسرة البرنامج وانا كان عندى ترقب لانى متاكد ان كل ده مش مقاسى حاجه واسعه عليا ..كنت بزاكر كل المواد وشاط فيها الااااااااااااااا التاريخ مكنتش بطيقه وده اللى اطاح بالمجموع وضرب بامال الجميع عرض منكرش انى مكنتش متوقع كده لكن صاحبى اللى جابلى النتيجه يومها الساعه 3 بليل صدمنى
بس اهو مش بنتعلم ببلاش اتعلمت انى مستهترش بحاجه زى التاريخ ده وان دايما يكون عندى هدف وطموح بسعى اليه انما اعيش كده وخلاص وزى ماتيجى دى غلط واكيد انا مش هقول جبت كام مجموع ونلتقى الحلقه القادمه
ليست هناك تعليقات:
إرسال تعليق