بسم الله الرحمن الرحيم
الصبح الساعه 7 صحيت جرررررى طبعا متاخر كالعاده على الشغل
اصلى عقبال املتك شغال هناك ف شركه مش هطول واقول شركه ايه بقولك صااحى متاخر
وقومت طيرااااان على الحمام وخدت الدوش التمام يااااااااااااا اخيرا زيست
ودخلت على الدولاب وتت تربت تربتت وهنا تفيد السرعه
ولبست البدله وبربط الكرافته وانا ع السلم مستعملا الطرابزين مع اشارات صوتيه من فصيله اوعى السريع وماما ورايا مش هتفطر يا حبيبى (كلمه كل يوم خدى اجازة بقى يا مامااا)
عارف يييييييييييييي قديمه طيب يا عم الامور نزلت من بيتنا وعلى موقف الميكروباصات طوالى
ودخت الموقف واسمع بقى احلى سيمفونيات عتبه عتبه ومقطم مقطم وسابع تامن عاشر وملكوت يا عمى
المهم يا سيدى انا رايح مدينه نصر مكرم عبيد ومع طول الانتظار ان تاتى عربيه واحده
يارب عربيه تيجى شالله يا ام هاشم المدير مبيعرفش جوز خالته ولا حتى مراته ف التاخير ان عربيه تيجى
ابداااااااا وادينا واقفين وجموع وجحافل وجيوش جرارة بقى من
المواطنين متحفزين تقولش يا خويا جنود فى معركه
وادينى واقف زى اللى واقفين وبتفرج تلاقى واحد جمبك فاتح الجرنان وبيقرا
واخينا التانى ناطط جوا الجرنان بتاع الراجل ده والراجل صاحب الجرنان اساسا مش شايف منه حاجه
المهم جت عربيه بعد طول انتظار وخد عندك بقى يا معلم
وهمت هذه الجموع مسرعه نحو العربيه تشوووووووتشووووووو ودى الموسيقى التصويريه
وطبعا انا عندى الرغبه انى اركب والرغبه لوحدها مش كفايه لازم دفعها قوه تدعمها
على طريقه انا شجيع السما ابو شنب بريما وعلى طريقه ورينا القوه يابنى انت وهوا
وقومت رايح ع العربيه والناس هتقطع بعضها على الركوب وحاسب ياكابتن على خلى بالك يا حضرت على مش تفتح ياا اخينا
وادينا بنشوف القرف ده يومااتى و على طول ركبت العربيه وقعدت ف الكنبه اللى ورا وكانى قعدت فى مكان لا تدخله شمس ولا هواء ونبدا رحله العذاب وطبعا احنا لسه الصبح والكل بينزل يكمل نومه ف الشارع وبيكون اريحله من البيت وبدانا نيااااااااااااااااااااااااع متتخضش دواحد بيتاوب والتانى اللى جمبى عمال يبصلى من اول مركبنا حاجه غريبه والله !!!!!!
وابصله يبص الناحيه التانيه اقول ف سرى ده عايز ايه ده من هنا لهنا قولتله انت تعرفنى يا استاذ قالى استاذ الله يكرم اصلك ده انت شكلك ابن ناس اوى (ابن ناس علشان قولتله استاذ!!!!! ماعلينا) قالى لا بس بشبه هو انت بتشتغل فين قولتله بتسال ليه قالى ناخد وندى مع بعض ف الكلام اهو نقصر السكه قولت يا فاتح ياعليم شعب يموت ف الرغى اللى نجدنى منه الاستاذ البيه الدكتور الباش مهندس تباع العربيه باشااااااا يا اخواتى
ايه يا ولا الحلاوة دى شاب جنتله يرتدى قميص مشجر
يشبه بهلوانات السيرك ولابس كاب على راسه والسيجارة ف ودنه ووسط سكون العربيه واذا بهذا الصوت الشنيع الفظيع المفزع الاجرة يا حضرات
يلا ياباشا انت وهو الله يكرمكوا يلا يا انسه والنبى يا حاجه مش وقت نوم ده كام الاجره يابنى ؟؟؟
وقال جنيه ونص ويتحول السكون الى هرج ومرج لييييييه وهات وخد وشد وجذب وهنااااا المفاجاه تاتاتاتااااااا
يظهر علينا السائق فى هذه اللحظه على خلفيه زكى رستم ومحمود المليجى كاى زعيم عصابه
اصل يا بهوات البنزين غلى وانتوا عارفين المعايش غاليه طيب انت عارف يا هندسه ديك النهار
صارف على البنت بنتى يج 30 جنيه وازيد على الدروس وكلمه من هنا على كلمه من هناك
واالبيه لالا الباشا السواق قالك مش طالع الا اما الاجر تتلم وطبعا انتو عارفين المدير مبيتفاهمش
وانا بقى اللى نايم اصحيه وااللى زعلان اواسيه يامى ادفعى ادفع يا كابتن يااعمناا ادف ربنا مايوقعك ف ضيقه وبعد مشقه
يرضخ الركاب ويدفعوا الاجرة المحدده من قبل البيه صاحب البارجه نورماندى تو تو تو ونصل الى مكان الشغل
والساعه تجاوزت التاسعه وانا اكد اكون مرهق تماما من جراء هذا العناااااااء
واريد ان ياتى السرير للشغل واقوله تعالى يا حبيبى
وهكذا يكون العناء يوميا
والعاقبه عندكم ف المسرات
ياه واضح ان ماساتك كبيره مع الميكروباصات
ردحذفده احنا عبرنا يا راجل اسهل من كده
اله يكون فى عونك
ردحذفبجد صعبت عليا
بس فرى نايس
تستاهل عشان تحرم تتأخر تانى.
ردحذفميرسى يا جماعه ربنا يخليكم
ردحذفمنورين والله