مصريتنا ..سلبيتنا .. حماها الله

السلام عليكم ورحمه الله وبركاته

مشهد معتاد تراه دائما ابطاله اثنين او ثلاثه او اربعه وليس المهم العدد نراه يوميا

ع المقاهى فى محطات الاتوبيس فى اماكن الانتظار العامه وما اكثرها لان حياتنا كلها

طوابير ولا يخفى عليكم هذه الطوابير واثرها بالغ الاهميه فى حياه الانسان

وتسمع الكلمه المعتاده اللى تربينا وترعرنا عليها( هششششش متتكلمش ف السياسه)

طيب انا عايز اسال هو الكلام ف السياسه عيب؟ يبقى اللى بشوفهم ف التليفزيون عايزين ربايه

طيب هو الكلام ف السياسه حرام ؟يبقى نفس الناس عايزين الهدايه

يابنى اسكت ابوس ايدك هتحبسنا طيب ليه هحبسكم طيب فهمنى وانا اسكت لو فهمتك مش هتسكت

طيب تعالى نتكلم ف اىحاجه هو انت خايف من ايه طيب طيب هقولك السياسه دى مش لينا

فى ناس تانينيه يابنى بتفهم فيها وهما يتكلموا فيها ويعملوا اللى شايفينو

طيب هما مين الناس دول وليه هما يعرفوا واحنا لاماحنا بنفهم ونتكلم زيهم

انا عارف انك هتودينا ف داهيه ان شاء الله من غير مقاطعه

طيب انا صغير اهو وهقولك ليه بقى انت وهو وهى بتخافوا علشان احنا

شعب بياكل من الطبق اللى يتحط قدامه علشان علشان احنا بنموت ف الانسياق

على مر تاريخنا كشعب لم نعيش الحياه النيابيه والديموقراطيه بشكله الصحيح

لو جيت قولت لواحد يعنى ايه ديموقراطيه ياحاج هيقولك يابنى انت بتتمهزأ بيا

هل اعتادنا على سياسه الكرباج ؟ هل اصبح منطق التعامل مع هذا الشعب التوجيه وليس الاختيار

من بعد ثورة يوليو وهى اللى تعد التحول الكبير فى تاريخ مصر قد تغير فكرنا اكثر من مرة

واقصد فكرهم واخدلى بالك اللى هما يتكلموا ف السياسه واحنا لا

قالوا للناس ده فى اتحاد اشتراكى ولازم نشترك والطبقه الكادحه وكلام كده حلو اوى

والبرجوازيه والراس ماليه والناس ياخويا قالت ده حلو ده يبقى معاه

وفضلنا شويه على كده والدنيا ماشيه جميله خالص لحد وبعد الاتحاد الاشتراكى جه

حاجه اسمها المجلس القومى والقمصان الزرقاء ولا ادرى ماهى سر القمصان الزرقاء

واحنا بردو معاه وشويه شويه والعمليه ماشيه وجه بعد كده فلا عصر السادات

فكر طبعاااا يعمل سياسه واحزاب ودوله وكده واسس ثلاث اتجاهات كان هو زعيم الوسط

وهو الحزب الوطنى اديكو مراتى وطبعاااااا كل الناس بقت مع الريس

ياعم اللى نعرفه احسن من اللى منعرفوش والريس مش هيعمل حاجه وحشه

وبصراحه انا بحبه وكمان ابن عمتى بيشكر اوى ف الحزب ده وفضلنا على كده

وانتهى عصر السادات وجه العصر الحالى ويشهد طفرة واضحه للحزب الوطنى

الحزب الاوحد فى مصر هو انت تعرف احزاب تانيه اصلا .. وانا مالى ياعم

ايوة تعالى انت يا حلو يا بتاع انا مالى امال مال مين

امال انت روحت ليه وافقت ع الاستفتاء

ولا انت كنت رايح تنتخب الريس زى باقى الشعب

طيب لما انتوا لغيتوا كل الاحزاب التانيه هتعملى انتخابات رئاسه ازاااااااااااى

هو انت بتضحك ع نفسك ولا عليا ولا هو المخرج عايز كده النهارده خلاص

الناس بقت عرايس خشبيه كل الفساد بقى من رموز الحزب الوطنى مظله الفساد الكبرى

لا والعجيب ايه انهم بيفتخروا انهم تبعوا

وطبعا فى بلدنا اللى ليه ضهر ميضربش ع بطنه

واللمبى قالك الجنيه غلب الكارنيه لا يا استاذ لمبى

كارنيه الحزن الوطنى غلب اى حاجه فى البلد طيب وبعدين ولحد امتى

هنفضل ننساق وننقاد لحد امتى ؟

فى 1976 خرجت الناس فى مظاهرات لارتفاع الاسعار قرشين بس

النهارده الاسعار بتتضاعف وانت تقولى وانا مالى انا عايز اكل عيش

انت كده مش بتاكل عيش انت بتاكل بال ... وانت مبسوط كمان

ياعم ابوس ايدك اصحى مش علشان خاطرى علشان ابنك ده وبنتك دى

علشان رغيف العيش اللى هيبقى بجنيه ومش هتلاقيه هتقولى وانا اعمل ايه يعنى

هقولك متعملش ياعم انا عايزك تفضل كده وتدعى طويل العمر يطول عمره وينصره ع مين

يعاديه هاى هيئ ادعى ادعى كمان وكمان يمكن يزودوك 30% ويزودوا الاسعار 90%

انا عرفك دلوقتى بتقول انا ايه اللى قعدنى مع الجدع ده ولاقيك بتقولى هتوحشنا

وطبعا انت وانا وكلنا عارفين الريس المنتظر اصلنا منعرفش غيره

وبمنطق اصله اتربى فيها وايده ف الصنعه من صغره يبقى تمام وكويس

فهنيالك ياريس يا جديد انت ورثتنا مع التركه ورثت 80 مليون

ادين بتسقف وافواه بتهتف ماهو زمان قالو ابن الدكتور بيطلع دكتور

وابن الظابط بيطلع ظابط وابن الشحات بيطلع شحات

وتحيا جمهوريه مصر المباركيه داعين الله بالعمر المديد

والوقت السعيد وشعب ف السياسه بليد